สงฺขารยมก

ปุจฺฉา – อภิธมฺมปิฏเก อาวุโส ฉฏฺเฐ ยมกปฺปกรเณ ทสสุ ยมเกสุ ฉฏฺฐํ สงฺขารยมกํ ภควตา กถํ วิตฺถารโต วิภชิตฺวา เทสิตํฯ

วิสฺสชฺชนา – อภิธมฺมปิฏเก ภนฺเต ฉฏฺเฐ ยมกปฺปกรเณ ทสสุ ยมเกสุ ฉฏฺฐํ สงฺขารยมกํ ‘‘ตโย สงฺขารา – กายสงฺขาโร วจีสงฺขาโร , จิตฺตสงฺขาโรฯ อสฺสาสปสฺสาสา กายสงฺขาโร, วิตกฺกวิจารา วจีสงฺขารา, สญฺญา จ เวทนา จ จิตฺตสงฺขาโร ฐเปตฺวา วิตกฺกวิจาเร สพฺเพปิ จิตฺตสมฺปยุตฺตกา ธมฺมา จิตฺตสงฺขาโร’’ติ เอวมาทินา ภควตา ปณฺณตฺติวารปวตฺติวารปริญฺญาวารสงฺขาเตหิ ตีหิ มหาวาเรหิ วิตฺถารโต วิภชิตฺวา เทสิตํฯ

อนุสยยมก

ปุจฺฉา – อภิธมฺมปิฏเก อาวุโส ฉฏฺเฐ ยมกปฺปกรเณ ทสสุ ยมเกสุ สตฺตมํ อนุสยยมกํ ภควตา กถํ วิตฺถารโต วิภชิตฺวา เทสิตํฯ

วิสฺสชฺชนา – อภิธมฺมปิฏเก ภนฺเต ฉฏฺเฐ ยมกปฺปกรเณ ทสสุ ยมเกสุ สตฺตมํ อนุสยยมกํ ‘‘สตฺต อนุสยา – กามราคานุสโย ปฏิฆานุสโย มานานุสโย ทิฏฺฐานุสโย วิจิกิจฺฉานุสโย ภวราคานุสโย อวิชฺชานุสโยฯ กตฺถ กามราคานุสโย อนุเสติ, กามธาตุยา ทฺวีสุ เวทนาสุ เอตฺถ กามราคานุสโย อนุเสตี’’ติ เอวมาทินา ภควตา อุปฺปตฺติฏฺฐานวาร อนุสยวาร สานุสยวาร ปชหนวาร ปริญฺญาวาร ปหีนวาร อุปฺปชฺชนวาร ธาตุวารสงฺขาเตหิ อฏฺฐหิ มหาวาเรหิ วิตฺถารโต วิภชิตฺวา เทสิตํฯ